កណ្តាល ថ្ងៃទី១១ ខែមីនា ឆ្នាំ២០២៤៖ លោក ឈាង រ៉ា រដ្ឋមន្ត្រីក្រសួងសុខាភិបាល បានដឹកនាំគណៈប្រតិភូក្រសួងសុខាភិបាល ចុះពិនិត្យការដំឡើងបរិក្ខារពេទ្យ និងហេដ្ឋារចនាសម្ព័ន្ធនៅមន្ទីរពេទ្យតេជោសែនកោះធំ ដើម្បីរង់ចាំការសម្ពោធនាពេលខាងមុខ។

ការចុះត្រួតពិនិត្យនេះ ដឹកនាំដោយលោក ឈាង រ៉ា បានធ្វើឡើងនៅថ្ងៃទី១១ ខែមីនា ឆ្នាំ២០២៤ មុនពេលពិធីបើកជាផ្លូវការ ដែលគ្រោងធ្វើនៅថ្ងៃទី១៣ ខែមីនា ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់ សម្តេចធិបតី ហ៊ុន ម៉ាណែត នាយករដ្ឋមន្ត្រី និងលោកស្រីបណ្ឌិត ពេជ្រ ចន្ទទមុនី្ន ហ៊ុនម៉ាណែត។

ស្ថិតក្នុងស្រុកកោះធំ ខេត្តកណ្តាល មន្ទីរពេទ្យតេជោសែនកោះធំ បានចាប់ផ្តើមបើកការដ្ឋានកាលពីថ្ងៃទី៧ ខែមករា ឆ្នាំ២០២២ ក្រោមការដឹកនាំដោយលោកឧបនាយករដ្ឋមន្ត្រី ស៊ុន ចាន់ថុល និងគាំទ្រដោយលោក ឈាង រ៉ា រួមជាមួយសប្បុរសជនក្នុង និងក្រៅប្រទេស សហការយ៉ាងជិតស្និទ្ធជាមួយមន្ទីរពេទ្យកាល់ម៉ែត មានគោលបំណងផ្តល់សេវាថែទាំសុខភាពយ៉ាងទូលំទូលាយជូនប្រជាពលរដ្ឋ។

មន្ទីរពេទ្យនេះមានអគារថ្មីចំនួនបីខ្នង ដែលលាតសន្ធឹងលើផ្ទៃដីសរុប១២.៥៤៤,៤ ម៉ែត្រការ៉េ ដែលមានសមត្ថភាពផ្ទុកអ្នកជំងឺបានចំនួន ១៥០គ្រែ និងបានបំពាក់ដោយគ្រឿងបរិក្ខារទំនើបៗ រួមទាំងម៉ាស៊ីនត្រជាក់ បច្ចេកវិទ្យាទំនើប ប្រព័ន្ធព័ត៌មានមន្ទីរពេទ្យ Hospital Information System (HIS) និងបរិក្ខារពេទ្យទំនើបៗ វាបានត្រៀមខ្លួនរួចជាស្រេចក្នុងការផ្តល់នូវការថែទាំសុខភាព។

មន្ទីពេទ្យតេជោសែនកោះធំ បានបំពេញតួនាទីយ៉ាងសំខាន់ក្នុងការដោះស្រាយតម្រូវការថែទាំសុខភាពរបស់ប្រជាពលរដ្ឋនៅស្រុកកោះធំ ស្រុកស្អាង ស្រុកលើកដែក និងស្រុកព្រៃកប្បាស ខេត្តតាកែវ ដោយផ្តល់សេវាព្យាបាល និងរោគវិនិច្ឆ័យ។